Los d'en mediu

La historia conócenla bien: seis rapacinos, de bona familia diz l'alcalde de la nuestra capital, anduvieron a guelpes con otros dos, yá más paisanos, y tamién de bona familia; eso dígolo yo. Y lo normal diba ser condenar y ponelo en manes de la policía. Yo mesmu yá escribí en contra de la violencia 'de los míos' hai cuarenta años, y sigo faciéndolo porque, cenciellamente, la condena nunca pue ser selectiva. Lo de la llei del embudu, non.

Nunca consentí los abusones. Y si, por dicir, estos seis agresores en cuenta gritar arriba España y maricones de mierda tuvieren gritao puxa Asturies o viva'l drechu consuetudinariu, el mio refugue diba ser hermanu. Porque'l problema nun ye en nome de qué s'emplega esa violencia; el mal ta n'usar la violencia pa facer política.

Puntu. Y, nuna pelea, los ciudadanos decentes tenemos que nos poner en mediu, pa separar; y ye arriesgao, porque acabes llevándoles de los dos llaos. Por eso, bendita policía. Y lo que nun entiendo ye porque, estos delitos de violencia –mesmo que los de violación– precisen de tanta xustificacion. Nadie-yos pregunta a les víctimes d'un robu si, en tiempos, nun robaren ellos tamién. O si aquel día nun diben provocando cola carteres afuera'l bolsu. O si nun sería too una broma... El refrán va del que roba a un lladron y tien cien años de perdón, pero nunca sentí a nengún políticu argumentar con eso. Cola violencia, sí; empezando pol alcalde.

Ye verdá que yá rectificó, y menos mal; porque aquello de tener qu'atender primero a les dos versiones, o lo de que "son chavales jóvenes, no creo que sean tan mala gente, o lo de yá (una de les víctimes) tuviera pa 2021 "otro incidente similar y a las mismas horas nun ye de recibu. Posicionase en mediu nun ye entemecer lo uno colo otro, agresores con agredíos, o responsabilidá institucional con poder xudicial. Hai que dicilo claro: los cobardes equí fueron los qu'atacaren, la responsabilidá penal tendrá que determinala l'autoridá y el problema equí nun ye la extrema drecha o el fascismu; lo qu'importa agora ye torgar que s'emplegue la violencia con fines políticos.

Eso ye lo peligroso. Y dame bien de rabia porque esta capital nuestra ye tan piquiñina, y galana, que tengo mieu acabar conociendo a les families d'unos y otros. Pero eso nun va quíta-y sentíu nin valir a la mio condena: va da-ylu más. Porque ser persona ye eso: ponese en mediu pa parar a los malos.